എടവണ്ണപ്പാറ ടൗൺ വികസനം: കെട്ടിട ഉടമകൾക്കും വ്യാപാരികൾക്കും ന്യായമായ നഷ്‌ടപരിഹാരം ഉറപ്പാക്കും – ടി.പി. അഷ്‌റഫലി MLA

എടവണ്ണപ്പാറ ടൗൺ വികസനം: കെട്ടിട ഉടമകൾക്കും വ്യാപാരികൾക്കും ന്യായമായ നഷ്‌ടപരിഹാരം ഉറപ്പാക്കും – ടി.പി. അഷ്‌റഫലി MLA

​

എടവണ്ണപ്പാറ: എടവണ്ണപ്പാറ അങ്ങാടിയിലെ രൂക്ഷമായ ഗതാഗതക്കുരുക്കിന് പരിഹാരം കാണുന്നതിനും നഗര വികസനത്തിനുമായി ഭാഗികമായോ പൂർണ്ണമായോ പൊളിച്ചുമാറ്റപ്പെടുന്ന കെട്ടിടങ്ങളുടെ ഉടമകൾക്കും വ്യാപാരികൾക്കും ന്യായമായ നഷ്ടപരിഹാരം ലഭ്യമാക്കാൻ ആവശ്യമായ നടപടികൾ സ്വീകരിക്കുമെന്ന് കൊണ്ടോട്ടി MLA ടി.പി. അഷ്‌റഫലി പറഞ്ഞു.

​നഗരവികസനത്തിന്റെ ഭാഗമായി പ്രയാസമനുഭവിക്കുന്ന കെട്ടിട ഉടമകൾക്കും വ്യാപാരികൾക്കും മതിയായ നഷ്‌ടപരിഹാരം ഉറപ്പാക്കണമെന്ന് ആവശ്യപ്പെട്ട് എടവണ്ണപ്പാറ മേഖല ബിൽഡിംഗ് ഓണേഴ്സ് അസോസിയേഷൻ നൽകിയ നിവേദനം സ്വീകരിച്ച് സംസാരിക്കുകയായിരുന്നു അദ്ദേഹം. എടവണ്ണപ്പാറയുടെ വികസന-സൗന്ദര്യവൽക്കരണ പ്രവൃത്തികൾ ത്വരിതഗതിയിൽ പൂർത്തിയാക്കാൻ വ്യാപാരികളുടെയും പൊതുജനങ്ങളുടെയും പൂർണ്ണ സഹകരണം ആവശ്യമാണെന്നും MLA കൂട്ടിച്ചേർത്തു.

​ഗ്രാമപഞ്ചായത്ത് പ്രസിഡന്റ് ആരിഫ, ജില്ലാ പഞ്ചായത്ത് മെമ്പർ ജൈസൽ എളമരം, പഞ്ചായത്ത് വൈസ് പ്രസിഡന്റ് എം.കെ.സി. നൗഷാദ്, വാർഡ് മെമ്പർമാരായ മുനീർ, ഭാസ്കരൻ മാസ്റ്റർ, എൻ.എച്ച്. ആലി, ആസിഫ് മാസ്റ്റർ എന്നിവരുടെ സാന്നിധ്യത്തിലാണ് നിവേദനം സമർപ്പിച്ചത്.

​ബിൽഡിംഗ് ഓണേഴ്സ് അസോസിയേഷൻ സംഘടനാ സെക്രട്ടറി കെ.എം. റസ്സാഖ്, കോഡിനേറ്റർ കരീം എളമരം, ഭാരവാഹികളായ ഫൈസൽ മാസ്റ്റർ, സി.വി. ബാബു, പുളിയക്കൽ അബൂബക്കർ തുടങ്ങിയവർ നിവേദക സംഘത്തിലുണ്ടായിരുന്നു.