പള്ളിക്കണ്ടി ജി.എൽ.പി സ്കൂളിൽ 'വർണ്ണോത്സവം 2026' ആഘോഷിച്ചു; 95-ാം വാർഷികാഘോഷം വർണ്ണാഭമായി
കോഴിക്കോട്: പള്ളിക്കണ്ടി നൈനാം വളപ്പ് ജി.എൽ.പി സ്കൂളിന്റെ 95-ാം വാർഷികാഘോഷമായ 'വർണ്ണോത്സവം 2026' വിപുലമായ പരിപാടികളോടെ ആഘോഷിച്ചു. ശനിയാഴ്ച രാവിലെ 9 മണി മുതൽ കുട്ടികളുടെ വിവിധങ്ങളായ കലാപരിപാടികൾ അരങ്ങേറി. വിദ്യാർത്ഥികളുടെ സർഗ്ഗവാസനകൾ പ്രകടമാക്കുന്ന വൈവിധ്യമാർന്ന കലാപ്രകടനങ്ങൾ ആഘോഷങ്ങൾക്ക് മാറ്റുകൂട്ടി.
വൈകുന്നേരം 5 മണിക്ക് നടന്ന സാംസ്കാരിക സമ്മേളനം ഡെപ്യൂട്ടി മേയർ ഡോ. എസ് ജയശ്രീ ഉദ്ഘാടനം ചെയ്തു. വിദ്യാലയങ്ങളുടെ വികസനവും സാംസ്കാരികമായ വളർച്ചയും സമൂഹത്തിന്റെ മുന്നേറ്റത്തിന് അനിവാര്യമാണെന്ന് അവർ ഉദ്ഘാടന പ്രസംഗത്തിൽ ഓർമ്മിപ്പിച്ചു. വാർഡ് കൗൺസിലർ ടി.പി.എം ജിഷാൻ ചടങ്ങിൽ അധ്യക്ഷത വഹിച്ചു. പ്രശസ്ത ഗാനരചയിതാവ് ശ്രീ. ബാപ്പു വെള്ളിപ്പറമ്പ് മുഖ്യാതിഥിയായി സംബന്ധിച്ചു.
വാർഷികാഘോഷത്തോടനുബന്ധിച്ച് രാത്രി 7 മണിക്ക് നവചേതന നാടൻ പാട്ട് സംഘം അവതരിപ്പിച്ച നാടൻ പാട്ട് അരങ്ങേറി. നാടൻ കലകളുടെ തനിമ ഒട്ടും ചോരാതെ അവതരിപ്പിച്ച ഈ സംഗീത വിരുന്ന് കാണികൾക്ക് വേറിട്ടൊരു അനുഭവമായി. സ്കൂൾ അധ്യാപകർ, രക്ഷിതാക്കൾ, നാട്ടുകാർ തുടങ്ങി നിരവധി പേർ പരിപാടിയിൽ പങ്കെടുത്തു.
Tags:
Kozhikode News