നടൻ ശ്രീനിവാസൻ അനുസ്മരണവും 'നാട്ടുനടപ്പ്' പുസ്തകചർച്ചയും സംഘടിപ്പിച്ചു

നടൻ ശ്രീനിവാസൻ അനുസ്മരണവും 'നാട്ടുനടപ്പ്' പുസ്തകചർച്ചയും സംഘടിപ്പിച്ചു

കല്ലമ്പലം: മലയാളവേദിയുടെ 232-ാമത് സാംസ്കാരിക കൂട്ടായ്മയുടെ ഭാഗമായി അന്തരിച്ച പ്രശസ്ത നടൻ ശ്രീനിവാസൻ അനുസ്മരണവും കവി ഒയൂർ രാമചന്ദ്രന്റെ 'നാട്ടുനടപ്പ്' എന്ന കവിതാ സമാഹാരത്തിന്റെ ചർച്ചയും സംഘടിപ്പിച്ചു. സാംസ്കാരിക രംഗത്തെ പ്രമുഖർ പങ്കെടുത്ത ചടങ്ങിൽ വൈവിധ്യമാർന്ന പരിപാടികളാണ് അരങ്ങേറിയത്.

കവിയും പ്രശസ്ത നാടക പ്രതിഭയുമായ സുൽഫി ഒയൂർ ശ്രീനിവാസൻ അനുസ്മരണ പ്രഭാഷണം നടത്തി. മലയാള സിനിമയിൽ ശ്രീനിവാസൻ അടയാളപ്പെടുത്തിയ ലാളിത്യത്തെയും സാമൂഹിക വിമർശനങ്ങളെയും അദ്ദേഹം പ്രഭാഷണത്തിൽ അനുസ്മരിച്ചു. ചടങ്ങിൽ ഓരനെല്ലൂർ ബാബു അധ്യക്ഷത വഹിച്ചു.

തുടർന്ന് നടന്ന കവിതാ സമാഹാര ചർച്ചയിൽ 'നാട്ടുനടപ്പ്' എന്ന കൃതിയുടെ പ്രസക്തിയെക്കുറിച്ച് ഗൗരവകരമായ സംവാദങ്ങൾ നടന്നു. പാമ്പുറം അരവിന്ദ്, ഡോ. അശോക്, ശ്രീകണ്ഠൻ കല്ലമ്പലം, ജഗൽമോഹൻ, രാമചന്ദ്രൻ കരവാരം, പ്രസന്നൻ വാടശ്ശേരിക്കോണം, ഷെഹീദ, ബീന, നവാസ് ഖാൻ കല്ലമ്പലം, ജയനിമോഹൻ, പ്രേസേനസിന്ധു, വിനോദ്, മുത്താന സുധാകരൻ തുടങ്ങിയ സാംസ്കാരിക പ്രവർത്തകർ ചർച്ചയിൽ പങ്കെടുത്തു സംസാരിച്ചു.

സാംസ്കാരിക കൂട്ടായ്മയുടെ ഭാഗമായി നടന്ന കാവ്യ-ഗാനാലാപനം പരിപാടിക്ക് മാറ്റുകൂട്ടി. നിരവധി കലാ-സാഹിത്യ പ്രേമികൾ ചടങ്ങിൽ സന്നിഹിതരായിരുന്നു.