മുഹമ്മദിന്റെ ഓർമ്മയിൽ തണലായി ഹോപ്പ്; മലബാർ ക്യാൻസർ സെന്ററിൽ രക്തദാന ക്യാമ്പ് സംഘടിപ്പിച്ചു

മുഹമ്മദിന്റെ ഓർമ്മയിൽ തണലായി ഹോപ്പ്; മലബാർ ക്യാൻസർ സെന്ററിൽ രക്തദാന ക്യാമ്പ് സംഘടിപ്പിച്ചു

അകാലത്തിൽ വിടപറഞ്ഞ ഹോപ്പ് രക്തദാതാവ് കടവത്തൂർ സ്വദേശി മുഹമ്മദിന്റെ സ്മരണാർത്ഥം തലശ്ശേരി മലബാർ ക്യാൻസർ സെന്ററിൽ രക്തദാന ക്യാമ്പ് സംഘടിപ്പിച്ചു. മുഹമ്മദിന്റെ ജന്മദിനത്തോടനുബന്ധിച്ച് ഹോപ്പ് ബ്ലഡ്‌ ഡോണേഴ്സ് ഗ്രൂപ്പിന്റെ ആഭിമുഖ്യത്തിലാണ് ക്യാമ്പ് നടത്തിയത്. ക്യാൻസർ രോഗികൾക്ക് കൈത്താങ്ങാവുക എന്ന ലക്ഷ്യത്തോടെയാണ് ഈ സ്മരണാഞ്ജലി ഒരുക്കിയത്.

​ഹോപ്പ് വനിതാ വിംഗ് അംഗം കൂടിയായ മുഹമ്മദിന്റെ മാതാവ് ഹഫ്സ ടീച്ചർ, ഹോപ്പ് മിഷൻ കോർഡിനേറ്റർ ഹരീഷ് കാരപ്പറമ്പ് എന്നിവർ ക്യാമ്പിന് നേതൃത്വം നൽകി. സ്നേഹപൂർവ്വമായ ഈ ഉദ്യമത്തിൽ പങ്കുചേർന്ന് 19 പേർ രക്തം ദാനം ചെയ്തു. സ്വന്തം ജീവൻ കൊണ്ട് മറ്റുള്ളവർക്ക് മാതൃകയായ ഒരു രക്തദാതാവിനോടുള്ള ഏറ്റവും വലിയ ആദരമായി ഈ ക്യാമ്പ് മാറി.

​മുഹമ്മദിന്റെ ഓർമ്മകൾ സമൂഹത്തിന് ഉപകാരപ്രദമായ രീതിയിൽ നിലനിർത്താൻ സാധിച്ചതിൽ ഹോപ്പ് ബ്ലഡ്‌ ഡോണേഴ്സ് പ്രവർത്തകർ സംതൃപ്തി രേഖപ്പെടുത്തി.