മോട്ടോർ തൊഴിലാളികളുടെ പ്രശ്നങ്ങളിൽ അടിയന്തര ഇടപെടൽ വേണം: എസ്. ടി. യു മുഖ്യമന്ത്രിക്കും ഗതാഗത മന്ത്രിക്കും നിവേദനം നൽകി

മോട്ടോർ തൊഴിലാളികളുടെ പ്രശ്നങ്ങളിൽ അടിയന്തര ഇടപെടൽ വേണം: എസ്. ടി. യു മുഖ്യമന്ത്രിക്കും ഗതാഗത മന്ത്രിക്കും നിവേദനം നൽകി

​തിരുവനന്തപുരം: സംസ്ഥാനത്തെ മോട്ടോർ തൊഴിലാളികൾ നേരിടുന്ന ഗുരുതരമായ തൊഴിൽ-ജീവിത പ്രശ്നങ്ങൾക്ക് അടിയന്തര പരിഹാരം കാണണമെന്ന് ആവശ്യപ്പെട്ട് എസ്ടിയു (STU) സംസ്ഥാന കമ്മിറ്റി മുഖ്യമന്ത്രി വി.ഡി. സതീശനും ഗതാഗത മന്ത്രി സി.പി. ജോണിനും നിവേദനം നൽകി. ഇന്ധനവില വർധന, ഇൻഷുറൻസ് പ്രീമിയം തുകയിലെ വർധനവ്, സ്പെയർ പാർട്സുകളുടെ അമിത വിലക്കയറ്റം, ഓൺലൈൻ ടാക്സി-ബൈക്ക് സേവനങ്ങളുടെ അനിയന്ത്രിതമായ പ്രവർത്തനം എന്നിവ കാരണം മോട്ടോർ തൊഴിലാളികളുടെ ഉപജീവനം ഇന്ന് ഗുരുതരമായ പ്രതിസന്ധിയിലാണെന്ന് നിവേദനത്തിൽ ചൂണ്ടിക്കാട്ടി. നിത്യജീവിത ചെലവുകൾ വർധിച്ചിട്ടും തൊഴിലാളികളുടെ വരുമാനം വർധിക്കാത്ത സാഹചര്യം കുടുംബങ്ങളുടെ ജീവിതത്തെ തന്നെ പ്രതികൂലമായി ബാധിക്കുകയാണ്.

​സംസ്ഥാനത്ത് വിവിധ റോഡ് വികസന പദ്ധതികളുടെയും നഗര നവീകരണ പ്രവർത്തനങ്ങളുടെയും ഭാഗമായി നിരവധി ടാക്സി, ഓട്ടോറിക്ഷ, ചരക്ക് വാഹന സ്റ്റാൻഡുകൾ എടുത്തുമാറ്റപ്പെട്ടിട്ടുണ്ട്. എന്നാൽ അവയ്ക്ക് പകരമായി അനുയോജ്യമായ സ്ഥലങ്ങളിൽ പുതിയ സ്റ്റാൻഡുകൾ അനുവദിക്കാത്തത് തൊഴിലാളികൾക്ക് വലിയ ബുദ്ധിമുട്ടുകൾ സൃഷ്ടിക്കുന്നുണ്ടെന്നും എസ്ടിയു ഭാരവാഹികൾ മുഖ്യമന്ത്രിയുടെയും ഗതാഗത മന്ത്രിയുടെയും ശ്രദ്ധയിൽപ്പെടുത്തി.

​ഇന്ധനവില വർധനയ്ക്ക് അനുസൃതമായി ടാക്സി, ഓട്ടോറിക്ഷ, ചരക്ക് വാഹനങ്ങളുടെ നിരക്കുകൾ കാലോചിതമായി പുതുക്കുക, മോട്ടോർ തൊഴിലാളി ക്ഷേമനിധി പെൻഷൻ ഗണ്യമായി വർധിപ്പിക്കുക, ക്ഷേമനിധി ആനുകൂല്യങ്ങൾ കാലതാമസം കൂടാതെ വിതരണം ചെയ്യുക എന്നിവയാണ് പ്രധാന ആവശ്യങ്ങൾ. ഓൺലൈൻ ടാക്സി, ബൈക്ക് ടാക്സി സേവനങ്ങൾക്ക് വ്യക്തമായ നിയമങ്ങളും നിയന്ത്രണങ്ങളും നടപ്പിലാക്കണമെന്നും, മോട്ടോർ തൊഴിലാളികൾക്കായി സമഗ്ര ആരോഗ്യ ഇൻഷുറൻസ് പദ്ധതിയും സാമൂഹ്യ സുരക്ഷാ പദ്ധതികളും ആവിഷ്കരിക്കണമെന്നും എസ്ടിയു ആവശ്യപ്പെട്ടു.

​റോഡ് വികസനത്തിന്റെ ഭാഗമായി നഷ്ടപ്പെട്ട വാഹന സ്റ്റാൻഡുകൾക്ക് പകരമായി അനുയോജ്യമായ ബദൽ സംവിധാനങ്ങൾ ഒരുക്കണം. അതോടൊപ്പം പ്രധാന സ്റ്റാൻഡുകളിലും നഗര കേന്ദ്രങ്ങളിലും വിശ്രമകേന്ദ്രം, കുടിവെള്ളം, ശുചിമുറി തുടങ്ങിയ അടിസ്ഥാന സൗകര്യങ്ങൾ ഉറപ്പാക്കണം.