അക്ഷര മിഠായി' മധുരവുമായി പ്രവേശനോത്സവം; ചാത്തമംഗലം ഗവ. എൽ പി സ്കൂളിൽ കുരുന്നുകൾക്ക് ആവേശ വരവേൽപ്പ്

അക്ഷര മിഠായി' മധുരവുമായി പ്രവേശനോത്സവം; ചാത്തമംഗലം ഗവ. എൽ പി സ്കൂളിൽ കുരുന്നുകൾക്ക് ആവേശ വരവേൽപ്പ്

​

ചാത്തമംഗലം: വിദ്യയുടെ ലോകത്തേക്ക് പിച്ചവെച്ചെത്തിയ കുരുന്നുകളെ വരവേറ്റ് ചാത്തമംഗലം ഗവ. എൽ പി സ്കൂളിൽ വിപുലമായ രീതിയിൽ പ്രവേശനോത്സവം സംഘടിപ്പിച്ചു. വർണ്ണാഭമായ ചടങ്ങുകളോടെ നടന്ന കുന്ദമംഗലം ഉപജില്ലാതല പ്രവേശനോത്സവത്തിന്റെ ഔദ്യോഗിക ഉദ്ഘാടനം കുന്ദമംഗലം ബ്ലോക്ക് പഞ്ചായത്ത് പ്രസിഡന്റ് ശ്രീമതി സി. കെ. ഫസീല നിർവ്വഹിച്ചു.

ചാത്തമംഗലം ഗ്രാമപഞ്ചായത്ത് വൈസ് പ്രസിഡന്റ് ശ്രീ എം. കെ. അനീഷ് ചടങ്ങിൽ അധ്യക്ഷത വഹിച്ചു.

​പുതുതായി സ്കൂളിലെത്തിയ ഒന്നാം ക്ലാസ് വിദ്യാർത്ഥികൾക്കായി കുന്ദമംഗലം MLA എം. എ. റസാഖ് മാസ്റ്റർ നൽകുന്ന സ്നേഹസമ്മാനമായ 'അക്ഷര മിഠായി' വിതരണത്തിന്റെ ഉദ്ഘാടനവും ബ്ലോക്ക് പഞ്ചായത്ത് പ്രസിഡന്റ് നിർവ്വഹിച്ചു. അക്ഷരമധുരം നുകർന്ന് പുഞ്ചിരിയോടെയാണ് കുട്ടികൾ പുതിയ അധ്യയനവർഷത്തിലേക്ക് ചുവടുവെച്ചത്.

​വിദ്യാലയത്തിന്റെ പെരുമ വിളിച്ചോതുന്ന വിജയഗാഥകൾക്കും ചടങ്ങ് വേദിയായി. CM KIDS (LSS) പരീക്ഷയിൽ ഉന്നത വിജയം കൈവരിച്ച മിടുക്കരായ വിദ്യാർത്ഥികളെ ചടങ്ങിൽ വെച്ച് അനുമോദിച്ചു. കുട്ടികൾക്കായുള്ള സ്കൂൾ കിറ്റുകളുടെ വിതരണം ഗ്രാമപഞ്ചായത്ത് മെമ്പർ ശ്രീമതി പുഷ്പവേണി നിർവ്വഹിച്ചു. കുന്ദമംഗലം AEO ശ്രീ കെ. രാജീവ് ചടങ്ങിൽ മുഖ്യാതിഥിയായി പങ്കെടുത്തു സംസാരിച്ചു.

​മുൻ പ്രധാനാധ്യാപകരായ ശ്രീ പ്രേമൻ മാസ്റ്റർ, ശ്രീ രാജൻ പാക്കത്ത്, മുൻ പ്രധാനാധ്യാപിക ശ്രീമതി താരകുമാരി, പി. ടി. എ. പ്രസിഡന്റ് ശ്രീ ശ്രീനിവാസൻ വി., എം. പി. ടി. എ. ചെയർപേഴ്സൺ ശ്രീമതി ശ്യാമിലി എന്നിവർ ചടങ്ങിൽ കുട്ടികൾക്ക് ആശംസകൾ നേർന്നു.

​പുതുതായി പ്രവേശനം നേടിയ കൊച്ചുകൂട്ടുകാരെ കിരീടമണിയിച്ചും താലപ്പൊലികളുടെ അകമ്പടിയോടെയുമാണ് സ്കൂൾ അങ്കണത്തിലേക്ക് ആനയിച്ചത്. വിദ്യാലയ മുറ്റത്ത് നിറഞ്ഞ ആഹ്ലാദാരവങ്ങൾ പ്രവേശനോത്സവത്തെ ഉത്സവപ്രതീതിയിലാക്കി. പ്രധാനാധ്യാപിക (ഇൻ-ചാർജ്) ശ്രീമതി ഷീബ ടി. എം. ചടങ്ങിൽ സ്വാഗതം ആശംസിക്കുകയും, സ്റ്റാഫ് സെക്രട്ടറി ശ്രീ എം. കെ. അബ്ദുൽ റസാഖ് നന്ദി രേഖപ്പെടുത്തുകയും ചെയ്തു.