മൊയ്‌തു ഹാജിയും ഗൾഫുകാരൻ കോഴിയും

മൊയ്‌തു ഹാജിയും ഗൾഫുകാരൻ കോഴിയും

നാട്ടിലെ വലിയ പുള്ളിയാണ് മൊയ്‌തു ഹാജി. ഗൾഫിൽ പത്തുമുപ്പത് കൊല്ലം ജോലി ചെയ്ത് മടങ്ങി വന്നതുകൊണ്ട് ഹാജിക്ക് എന്തിലും ഏതിലും ഒരു ഗമയുണ്ട്. ഈയിടെ ഹാജി ചന്തയിൽ പോയി ഒരു പൂവൻകോഴിയെ വാങ്ങി. കാണാൻ നല്ല അഴകുള്ള, ചുവന്ന പൂവുള്ള ഒന്നാന്തരം കോഴി!

ഹാജി നാട്ടുകാരോട് പറഞ്ഞു: "ഇത് സാധാരണ കോഴിയല്ല, എനിക്കറിയാം ഇതിന്റെ ഗുണം. ഇതിനെ ഉച്ചയ്ക്ക് നോക്കിയാൽ മതി, കൃത്യസമയത്ത് ഇത് കൂവും. ഇതിന് സമയബോധം ഇത്തിരി കൂടുതലാണ്!"

ഹാജിയുടെ അയൽവാസിയും കുസൃതിക്കാരനുമാണ് ഹംസ. ഒരു ദിവസം ഉച്ചയ്ക്ക് ഒന്നരയായിട്ടും കോഴി കൂവുന്നില്ല. ഹംസ പതുക്കെ ഹാജിയുടെ വീട്ടുപടിക്കൽ ചെന്നു.

"എന്താ ഹാജ്യാ... കോഴി ഉച്ചയ്ക്ക് കൂവും എന്ന് പറഞ്ഞിട്ട് ഒച്ചയൊന്നും കേൾക്കുന്നില്ലല്ലോ..." ഹംസ ചോദിച്ചു.

ഹാജി തന്റെ കയ്യിലുണ്ടായിരുന്ന തോർത്തുമുണ്ട് തോളത്തിട്ട് ഗമയിൽ പറഞ്ഞു.അതൊക്കെ കൂവും ഹംസേ... ഇതിന് ഇവിടുത്തെ കാലാവസ്ഥ ഒന്ന് ശരിയായി വരുന്നതേയുള്ളൂ. ഗൾഫിലെ ചൂടിൽ വളർന്നതല്ലേ, ഇവിടുത്തെ തണുപ്പടിച്ച് തൊണ്ട ഒന്ന് അടഞ്ഞതാവും.

അല്പം കഴിഞ്ഞതും കോഴി വീടിന്റെ തിണ്ണയിൽ കയറി നിന്ന് ഉറക്കെ കൂവി കൊക്കരക്കോ...

ഹംസ കളിയാക്കി ചിരിച്ചു. ഹാജ്യാ, സമയം ഇപ്പൊ ഒന്നര കഴിഞ്ഞു. ഇതിനെയാണോ നിങ്ങൾ സമയബോധമുള്ള കോഴിയെന്ന് പറഞ്ഞത്?"

ഹാജി വിടുമോ... അദ്ദേഹം ഉടനെ കോഴിയുടെ അടുത്തേക്ക് ചെന്നു. എടാ ഹംസേ, നീ വിവരമില്ലാതെ പറയരുത്. ഇതിനെ ഞാൻ വാങ്ങിയത് ദുബായിൽ നിന്ന് വന്ന ഒരാളുടെ അടുത്തുനിന്നാണ്. അവിടെ ഇപ്പൊ സമയം എത്രയാണെന്ന് നിനക്കറിയാമോ? അവിടെ ഉച്ചയ്ക്ക് പന്ത്രണ്ടേ മുക്കാൽ ആവുന്നതേയുള്ളൂ! ഇവൻ ഗൾഫ് സമയം നോക്കിയാണ് കൂവുന്നത്. അല്ലാതെ ഇവിടുത്തെ ലോക്കൽ സമയം നോക്കിയല്ല!"

ഇതുകേട്ട് ഹംസ അന്തംവിട്ടു നിന്നു.അപ്പൊ ഈ കോഴിക്ക് ഗൾഫ് സമയം അറിയാമെന്നാണോ ഹാജി പറയുന്നത്...

"പിന്നല്ലാതെ എന്റെ കൂടെ ഇരിക്കുന്നത് കൊണ്ട് ഇവനും കുറച്ച് വിദേശ ബുദ്ധി കിട്ടിയിട്ടുണ്ട്," ഹാജി മീശ പിരിച്ചു.

അപ്പോഴാണ് ഹാജിയുടെ ഭാര്യ പാത്തുമ്മ അങ്ങോട്ട് വന്നത്. പാത്തുമ്മ ചോദിച്ചു "മനുഷ്യാ... ഈ കോഴിക്ക് രാവിലെ തൊട്ട് തീറ്റ കൊടുക്കാൻ മറന്നോ? വിശന്നിട്ടാണോ ഇത് ഇങ്ങനെ കിടന്ന് കൂവുന്നത്...

ഹാജി പതുക്കെ പാത്തുമ്മയുടെ അടുത്ത് ചെന്ന് രഹസ്യമായി പറഞ്ഞു...നീ മിണ്ടാതിരിക്ക് പാത്തുമ്മേ... ഇതിന് ഗൾഫ് കണക്കാണ് എന്ന് പറഞ്ഞ് ഞാൻ അവനെ വിശ്വസിപ്പിച്ചിരിക്കുകയാണ്. നീയിത് പൊളിക്കല്ലേ..

ഇതുകേട്ട് പിന്നിൽ നിന്ന ഹംസ ചിരിച്ചു മറിഞ്ഞു. അവൻ വിളിച്ചു പറഞ്ഞു "ഹാജ്യാ, എന്നാ പിന്നെ ഈ കോഴി മുട്ടയിടുമ്പോൾ ദിർഹം കിട്ടുമോ എന്ന് കൂടി നോക്കിക്കോ...

അന്ന് തൊട്ട് ഹാജി കോഴിയെ അധികം പുറത്തിറക്കാറില്ല. ആരെങ്കിലും ചോദിച്ചാൽ ഹാജി പറയും കോഴി ഇപ്പൊ ലീവിലാണ്, നാട്ടിലെ വെള്ളം പിടിക്കാത്തതുകൊണ്ട് ഗൾഫിലേക്ക് തിരിച്ചു പോകാൻ നിൽക്കുകയാണ്

സയ്യിദ് സിനാൻ പരുത്തിക്കോട്