​മൈതാനത്ത് ആവേശപ്പൂരമൊരുക്കി സി.എച്ച് സ്പോർട്സ് അക്കാദമി; വാഴക്കാടും ആക്കോടും നേർക്കുനേർ!

​മൈതാനത്ത് ആവേശപ്പൂരമൊരുക്കി സി.എച്ച് സ്പോർട്സ് അക്കാദമി; വാഴക്കാടും ആക്കോടും നേർക്കുനേർ!

​

വാഴക്കാട്: കേരളത്തിന്റെ മുൻ മുഖ്യമന്ത്രി സി.എച്ച്. മുഹമ്മദ് കോയ സാഹിബിന്റെ നാമധേയത്തിൽ പ്രവർത്തിക്കുന്ന വാഴക്കാട് സി.എച്ച് സ്പോർട്സ് അക്കാദമി സംഘടിപ്പിക്കുന്ന അഞ്ചാമത് ഇ. അഹമ്മദ് സാഹിബ് സ്മാരക ഫുട്ബോൾ ടൂർണമെന്റിൽ ആവേശകരമായ പോരാട്ടം. വാഴക്കാട് ഹയർ സെക്കൻഡറി സ്കൂൾ ഗ്രൗണ്ടിൽ നടന്ന വാശിയേറിയ മത്സരത്തിൽ ആക്കോട് ആർ.എഫ്.സി (RFC) ചെണ്ണയിലിനെ പരാജയപ്പെടുത്തി ഡീ വൺ എഫ്.സി (Dee One FC) വാഴക്കാട് ജേതാക്കളായി.

​

മുൻ സന്തോഷ് ട്രോഫി താരം ബുജൈർ അടക്കമുള്ള ഫിഫ മഞ്ചേരിയുടെ കരുത്തുറ്റ നിരയെ അണിനിരത്തിയാണ് ഡീ വൺ എഫ്.സി മൈതാനത്തിറങ്ങിയത്. പ്രമുഖരായ 16 ടീമുകൾ മാറ്റുരയ്ക്കുന്ന ഈ ടൂർണമെന്റ് ഇതിനോടകം തന്നെ മലപ്പുറത്തെ ഫുട്ബോൾ പ്രേമികൾക്കിടയിൽ വലിയ ശ്രദ്ധ നേടിക്കഴിഞ്ഞു.

​മത്സരത്തിൽ മണ്ഡലം കോൺഗ്രസ് നേതാവും പഞ്ചായത്ത് UDF ലൈസൺ കമ്മറ്റി മെമ്പറുമായ കരീം എളമരം മുഖ്യാതിഥിയായിരുന്നു. മികച്ച പാർലമെന്റേറിയനും മുൻ കേന്ദ്രമന്ത്രിയുമായിരുന്ന ഇ. അഹമ്മദ് സാഹിബിന്റെ സ്മരണാർത്ഥം സംഘടിപ്പിക്കുന്ന ഈ ടൂർണമെന്റിലെ ലാഭവിഹിതം പൂർണ്ണമായും ജീവകാരുണ്യ പ്രവർത്തനങ്ങൾക്കായാണ് വിനിയോഗിക്കുന്നത്.

പ്രാദേശിക കായിക പ്രതിഭകളെ പ്രോത്സാഹിപ്പിക്കുന്നതിനൊപ്പം കാരുണ്യ പ്രവർത്തനങ്ങളിൽ മാതൃകയാവുകയും ചെയ്യുന്ന സി.എച്ച് അക്കാദമിയുടെ ഈ നീക്കം ഏറെ പ്രശംസനീയമാണ്.

​ചടങ്ങിൽ സി.പി.എം നേതാവും പഞ്ചായത്ത് മെമ്പറുമായ സി. ഭാസ്‌കരൻ, പഞ്ചായത്ത് മുസ്ലിം ലീഗ് സെക്രട്ടറി ആർ.പി. ഹാരിസ്, സി.എച്ച് സ്പോർട്സ് അക്കാദമി ഭാരവാഹികൾ, കായിക പ്രേമികൾ തുടങ്ങിയവർ സംബന്ധിച്ചു.