റംസാനിലെ ചന്ദ്രികയും .... ആത്മചൈതന്യ യാത്രയും..... നെല്ലിയോട്ട് ബഷീർ

റംസാനിലെ ചന്ദ്രികയും ....

ആത്മചൈതന്യ യാത്രയും.....

നെല്ലിയോട്ട് ബഷീർ

റംസാൻ വ്രതം ശാരീരികവും മാനസികാവുമായ ശുദ്ധീകരണം പ്രധാനം ചെയ്യുന്ന ആത്മീയ യാത്രയാണ്.ഇസ്ലാം സമൂഹത്തിന്റെ അഞ്ചു പ്രധാന കർമങ്ങളിൽ ഒന്നായ നോമ്പ്, മനുഷ്യന്റെ ജീവിതത്തെ ക്രമീകരിക്കുന്ന ഒരു ദിവ്യക്രമമായി വിശ്വസിക്കപ്പെടുന്നു. ഓരോ വർഷവും ഹിജ്റ കലണ്ടറിലെ ഒമ്പതാം മാസമായ റംസാൻ വരുമ്പോൾ ലോകമെമ്പാടുമുള്ള മുസ്ലിംകൾ ആത്മനിയന്ത്രണത്തിന്റെയും ആത്മപരിശോധനയുടെയും പാതയിലേക്ക് നീങ്ങുന്നു. വെറും വിശപ്പും ദാഹവും സഹിക്കുന്നത് മാത്രമല്ല ഈ റംസാൻ വ്രതം; ശരീരത്തെയും മനസ്സിനെയും ആത്മാവിനെയും ഒരുപോലെ ശുദ്ധീകരിക്കുന്ന സമഗ്രമായ ഒരു പരിശീലനമാണിത്.

പുലർച്ച സമയത്തെ അത്തായം മുതൽ സന്ധാവേളയിലെ ഇഫ്താർ വരെ ഭക്ഷണ-പാനീയങ്ങൾ ഉപേക്ഷിക്കുന്നത് ശരീരത്തിന് ഒരു നിയന്ത്രിത ഇടവേള നൽകുന്നു. സാധാരണ ദിവസങ്ങളിൽ അനിയന്ത്രിതമായി കഴിക്കുന്ന ഭക്ഷണരീതി ശരീരത്തിന്റെ താളം തെറ്റിക്കാറുണ്ട്.നോമ്പ് ആ ശീലങ്ങളെ പുനഃക്രമീകരിക്കുന്നു. ദഹനസംവിധാനത്തിന് വിശ്രമം നൽകുന്നു. ഭക്ഷണത്തിന്റെ വില മനസ്സിലാക്കാൻ രാജാവിനെയും പ്രജയെയും ഒരേപോലെ പഠിക്കുന്നു. ചെറിയൊരു കഷണം അപ്പത്തിന്റെയും ഒരു തുള്ളി വെള്ളത്തിന്റെയും മഹത്വം അനുഭവത്തിലൂടെ തിരിച്ചറിയുന്നു. ആരോഗ്യപരമായ നിയന്ത്രണങ്ങൾ പാലിച്ചാൽ നോമ്പ് ശരീരത്തിലെ അനാവശ്യ കൊഴുപ്പുകൾ കുറയ്ക്കാനും രക്തത്തിലെ പഞ്ചസാരയുടെ അളവ് നിയന്ത്രിക്കാനും സഹായകമാകുന്നു.പക്ഷേ നോമ്പിന്റെ ലക്ഷ്യം വെറും ശരീരാരോഗ്യം മാത്രമല്ല; അത് ആത്മനിയന്ത്രണത്തിന്റെ പരിശീലനമാണ്.

വിശപ്പും ദാഹവും മനുഷ്യന്റെ അടിസ്ഥാന സ്വഭാവങ്ങളെ പരീക്ഷിക്കുന്നു. സാധാരണ സാഹചര്യങ്ങളിൽ ചെറുതായി തോന്നുന്ന കോപവും അസഹിഷ്ണുതയും വിശപ്പിന്റെ സമയത്ത് കൂടുതൽ ശക്തമാകാം. എന്നാൽ നോമ്പ് പാലിക്കുന്നവൻ തന്റെ വികാരങ്ങളെ നിയന്ത്രിക്കാൻ പഠിക്കുന്നു. ആരെങ്കിലും പ്രകോപിച്ചാൽ “ഞാൻ നോമ്പുകാരനാണ് ” എന്ന് മനസ്സിൽ ഓർത്തെടുക്കുന്ന ആ നിമിഷം തന്നെ ആത്മവിജയത്തിന്റെ തുടക്കമാണ്.ഈ ആത്മനിയന്ത്രണം ജീവിതത്തിന്റെ എല്ലാ മേഖലകളിലും പ്രയോജനപ്പെടുന്നു. കുടുംബബന്ധങ്ങളിൽ, തൊഴിൽ മേഖലയിലും സാമൂഹിക ഇടപെടലുകളിലും ഒരു സമത്വബോധം വളരാൻ ഇത് സഹായിക്കുന്നു.

റംസാൻ കരുണയുടെ മാസമെന്നറിയപ്പെടുന്നു. വിശപ്പിന്റെ അനുഭവം മറ്റുള്ളവരുടെ വേദന മനസ്സിലാക്കാൻ സഹായിക്കുന്നു. ഒരു ദിവസം മുഴുവൻ വിശപ്പോടെ കഴിയുന്നവൻ ദാരിദ്ര്യത്തിന്റെ യാഥാർത്ഥ്യം കൂടുതൽ ആഴത്തിൽ തിരിച്ചറിയുന്നു. അതുകൊണ്ടു തന്നെ ദാനധർമ്മങ്ങൾക്ക് ഈ മാസത്തിൽ പ്രത്യേക പ്രാധാന്യമുണ്ട്. സക്കാത്തും സദഖയും വഴി സമ്പത്തിന്റെ ശുദ്ധീകരണവും നടക്കുന്നു.സ്വന്തമായി ലഭിച്ച അനുഗ്രഹങ്ങൾ മറ്റുള്ളവരുമായി പങ്കിടുമ്പോൾ ആത്മസന്തോഷം വളരുന്നു.കൊടുക്കുന്ന കൈയുടെ സന്തോഷം സ്വീകരിക്കുന്ന കൈയുടെ നന്ദിയുമായി ചേരുമ്പോൾ സമൂഹത്തിൽ സൗഹൃദത്തിന്റെ പാലങ്ങൾ പണിയപ്പെടുന്നു.

റംസാനിലെ രാത്രികൾ പ്രാർത്ഥനയുടെ പ്രകാശത്തിൽ നിറഞ്ഞിരിക്കും.വിശുദ്ധ ഗ്രന്ഥമായ ഖുർആൻ ഈ മാസത്തിലാണ് അവതിരിച്ചതെന്ന വിശ്വാസം ഇസ്ലാം മാതവിശ്വാസികളെ കൂടുതൽ ആരാധനയിലേക്ക് നയിക്കുന്നു.ഖുർആൻ പാരായണം,തറാവീഹ് നമസ്കാരം,ദുആകൾ,ഇവയെല്ലാം ആത്മാവിനെ ശുദ്ധീകരിക്കുന്ന മാർഗങ്ങളാണ്. ദിനചര്യയിലെ തിരക്കുകളിൽ നഷ്ടപ്പെടുന്ന ആത്മസംഭാഷണം ഈ മാസത്തിൽ പുനർജീവിക്കുന്നു. മനുഷ്യൻ തന്റെ സൃഷ്ടാവിനോടുള്ള ബന്ധം പുതുക്കുന്നു. ജീവിതത്തിന്റെ അർത്ഥത്തെക്കുറിച്ചുള്ള ചിന്തകൾ കൂടുതൽ ഗൗരവതരമാകുന്നു.

മാനസികാരോഗ്യത്തിന്റെ ദൃഷ്ടികോണിലൂടെ നോക്കുമ്പോൾ റംസാൻ ഒരു ആത്മപരിശോധനയുടെ അവസരംകൂടിയാണ് . അനാവശ്യ വിനോദങ്ങൾ ഒഴിവാക്കി,കൂടുതൽ സമയം പ്രാർത്ഥനക്കും വായനയ്ക്കും കുടുംബസമേതം ചിലവഴിക്കുമ്പോൾ മനസ്സിന് ഒരു സമാധാനം ലഭിക്കുന്നു.ഉപവാസം മനസ്സിനെ ശാന്തമാക്കുന്നു എന്നത് പലർക്കും അനുഭവസത്യമാണ്. ആത്മനിയന്ത്രണത്തിന്റെ ബോധം ആത്മവിശ്വാസം വർധിപ്പിക്കുന്നു.“എനിക്ക് എന്റെ ആഗ്രഹങ്ങളെ നിയന്ത്രിക്കാനാകുന്നു” എന്ന തിരിച്ചറിവ് വ്യക്തിത്വവികസനത്തിന് വലിയ അടിത്തറയാണ്.

റംസാൻ കുടുംബബന്ധങ്ങളെ കൂടുതൽ സജീവമാക്കുന്ന മാസവുമാണ്.അത്തായത്തിനും നോമ്പ് തുറക്കലിനും ഒരുമിച്ചുകൂടുന്ന കുടുംബാംഗങ്ങൾ തമ്മിൽ പങ്കിടുന്ന സന്തോഷം ആത്മബന്ധങ്ങളെ ശക്തിപ്പെടുത്തുന്നു.ഒരു പാത്രം കഞ്ഞിയും ചില ഈന്തപ്പഴങ്ങളും മാത്രം ഉണ്ടായാലും അതിൽ നിറയുന്നത് സ്‌നേഹമാണ്. കുട്ടികൾക്ക് നോമ്പിന്റെ അർത്ഥം പറഞ്ഞു കൊടുക്കുമ്പോൾ ഉത്തരവാദിത്വബോധവും കരുണയും അവരിൽ വളരുന്നു. മാതാപിതാക്കൾ മാതൃകയാകുമ്പോൾ അടുത്ത തലമുറയ്ക്ക് ആത്മീയ മൂല്യങ്ങൾ പകർന്നു നൽകപ്പെടുന്നു.

സമൂഹപരമായ നിലയിൽ റംസാൻ ഐക്യത്തിന്റെ പ്രതീകമാണ്.സമ്പന്നനും ദരിദ്രനും ഒരുപോലെ വിശപ്പിന്റെ അനുഭവത്തിലൂടെ കടന്നുപോകുന്നു. പള്ളികളിൽ ഒത്തുകൂടി പ്രാർത്ഥിക്കുന്നവരുടെ നിരയിൽ പദവിയും പണവും പ്രാധാന്യമില്ലാതാകുന്നു. എല്ലാവരും ഒരേ ദൈവത്തിന്റെ മുമ്പിൽ സമത്വത്തോടെ നിൽക്കുന്നു.ഈ സമത്വബോധം സാമൂഹിക വിഭജനം കുറയ്ക്കാൻ സഹായിക്കുന്നു. വ്യത്യസ്ത പശ്ചാത്തലങ്ങളിലുള്ള ആളുകൾ തമ്മിൽ സഹകരണം വർധിക്കുന്നു.

റംസാൻ ആത്മനിയന്ത്രണത്തിന്റെ പരിശീലനമെന്നതുപോലെ ആത്മശുദ്ധിയുടെ പ്രക്രിയയും ആണ്. പാപങ്ങളിൽ നിന്ന് വിട്ടുനിൽക്കാനുള്ള ശ്രമം ഈ മാസത്തിൽ കൂടുതൽ ശക്തമാകുന്നു. ദുഷ്ശീലങ്ങൾ ഉപേക്ഷിക്കാൻ പലരും ഈ മാസത്തെ ഒരു തുടക്കമായി തിരഞ്ഞെടുക്കുന്നു.ദുശ്ശീലങ്ങൾ,അസഭ്യവാക്കുകൾ, അനാവശ്യ കോപം,ഇവയെല്ലാം നിയന്ത്രിക്കാൻ നോമ്പ് സഹായകമാകുന്നു. മനസ്സിലെ മാലിന്യങ്ങൾ നീക്കി ഒരു പുതിയ തുടക്കത്തിന് തയ്യാറാകുന്ന കാലഘട്ടമാണിത്.

ശാരീരികമായി നോമ്പ് പാലിക്കുമ്പോൾ ശരീരം ഒരു നിയന്ത്രിത ക്രമത്തിലേക്ക് കടക്കുന്നു. ഉറക്കവും ഭക്ഷണവും നിശ്ചിത സമയത്ത് ക്രമീകരിക്കപ്പെടുന്നു. ഇത് ജീവിതശൈലിയെ കൂടുതൽ ക്രമബദ്ധമാക്കുന്നു. എന്നാൽ ആരോഗ്യപ്രശ്നങ്ങൾ ഉള്ളവർ വൈദ്യോപദേശം തേടി നോമ്പ് പാലിക്കേണ്ടതിന്റെ ആവശ്യകതയും ഇസ്ലാംമതം ഊന്നിപ്പറയുന്നു.ആത്മീയ ലക്ഷ്യം ശരീരത്തിന് ഹാനികരമാകാൻ പാടില്ല എന്ന ബോധം ഇവിടെ പ്രകടമാണ്.

റംസാൻ ആത്മീയ ഉയർച്ചയുടെ ഉച്ചകോടിയിലേക്ക് നയിക്കുന്ന അവസരമാണ്. ലയ്ലത്തുൽ ഖദർ എന്ന വിശേഷ രാത്രി ഈ മാസത്തിൽ ഉൾപ്പെടുന്നു എന്ന വിശ്വാസം വിശ്വാസികളെ കൂടുതൽ ആരാധനയിലേക്ക് പ്രേരിപ്പിക്കുന്നു. ആയിരം മാസങ്ങളെക്കാൾ ശ്രേഷ്ഠമായ രാത്രിയെന്ന വിശേഷണം മനുഷ്യനെ ആത്മീയ ചിന്തയിലേക്ക് നയിക്കുന്നു.ഓരോ നിമിഷവും മൂല്യമുള്ളതാണെന്ന് തിരിച്ചറിയാൻ ഈ വിശ്വാസം സഹായിക്കുന്നു.

റംസാൻ അവസാനിക്കുമ്പോൾ ആഘോഷമായി എത്തുന്നത് ഈദുല്‍ ഫിത്വറാണ്.ഒരു മാസം നീണ്ട ആത്മപരിശീലനത്തിന്റെ വിജയാഘോഷമാണത്. പുതിയ വസ്ത്രങ്ങളും മധുരങ്ങളും മാത്രം അല്ല ആ ദിനത്തിന്റെ സന്തോഷം; ആത്മശുദ്ധിയുടെ സന്തോഷമാണ് അതിന്റെ അടിസ്ഥാനം. നോമ്പിലൂടെ നേടിയ ആത്മനിയന്ത്രണവും കരുണയും സമത്വബോധവും ജീവിതത്തിന്റെ ശേഷിക്കുന്ന മാസങ്ങളിലേക്കും കൊണ്ടുപോകാനുള്ള പ്രതിജ്ഞയാണ് യഥാർത്ഥ ആഘോഷം.

റംസാൻ വെറും മതാചാരമല്ല; അത് മനുഷ്യനെ സമഗ്രമായി രൂപാന്തരപ്പെടുത്തുന്ന ഒരു പരിശീലന ശിബിരമാണ്. ശരീരത്തെ നിയന്ത്രിച്ചുകൊണ്ട് മനസ്സിനെ ശുദ്ധീകരിക്കുകയും ആത്മാവിനെ ഉയർത്തുകയും ചെയ്യുന്ന സമഗ്രമായ മാർഗമാണ് നോമ്പ്.വിശപ്പിന്റെയും ദാഹത്തിന്റെയും ഇടയിൽ വളരുന്ന സഹനശക്തി ജീവിതത്തിലെ പ്രതിസന്ധികളെ നേരിടാനുള്ള ധൈര്യമായി മാറുന്നു.കരുണയും ദാനശീലവും സമൂഹത്തെ കൂടുതൽ മാനുഷിക മൂല്യമുള്ളതാക്കി മാറ്റുന്നു. ആത്മപരിശോധന വ്യക്തിയെ കൂടുതൽ ഉത്തരവാദിത്വമുള്ളവനാക്കുന്നു.അതിനാൽ റംസാൻ വ്രതം ശാരീരികവും മാനസികാവുമായ ശുദ്ധീകരണത്തിന്റെ മഹത്തായ പാഠശാലയാണ്.മനുഷ്യനെ കൂടുതൽ നല്ലവനാക്കി മാറ്റുന്ന ദിവ്യാനുഭവം.