മലയാളി മാലാഖ ബുഷ്റ സി.കെ: ബഹ്‌റൈനിൽ ഒരു ജീവൻ രക്ഷിച്ചു

മലയാളി മാലാഖ ബുഷ്റ സി.കെ: ബഹ്‌റൈനിൽ ഒരു ജീവൻ രക്ഷിച്ചു

ബഹ്‌റൈൻ: 2025 ജൂൺ 8 ശനിയാഴ്ച, ബഹ്‌റൈനിലെ നഹ്‌ദി ഫാമിലി റെസ്റ്റോറൻ്റിൽ പെരുന്നാൾ പിറ്റേന്ന് തിരക്കേറിയ അന്തരീക്ഷത്തിൽ, തലശ്ശേരി സ്വദേശിനി ശ്രീമതി ബുഷ്റ സി.കെ. എന്ന മലയാളി വനിതയുടെ സമയോചിതമായ ഇടപെടൽ ഒരു ജീവന് പുതുജീവൻ നൽകി.

തൻ്റെ കുടുംബസുഹൃത്തുക്കളോടൊപ്പം ഭക്ഷണം കഴിച്ച് ബില്ലടക്കാൻ കാത്തുനിൽക്കുകയായിരുന്ന ബുഷ്റ, തൊട്ടടുത്ത മേശയിൽ ആളുകൾ തിങ്ങിക്കൂടുന്നത് ശ്രദ്ധിച്ചു. ഒരു കുടുംബത്തിലെ നാഥൻ കുഴഞ്ഞുവീണതായിരുന്നു കാരണം. ചുറ്റും നിന്നവർ പരിഭ്രാന്തരായി ആംബുലൻസിനായി മാറിമാറി വിളിച്ചെങ്കിലും സഹായം എത്തിയില്ല. മറ്റൊന്നും ആലോചിക്കാതെ, കൈവശമുണ്ടായിരുന്ന മൊബൈൽ ഫോൺ പോലും ശ്രദ്ധിക്കാതെ, ബുഷ്റ ജനക്കൂട്ടത്തിനിടയിലേക്ക് പാഞ്ഞെത്തി.

കുഴഞ്ഞുവീണയാളുടെ പൾസ് പരിശോധിച്ചപ്പോൾ, അത് നിലച്ചതായും ശരീരം തണുത്തുറഞ്ഞതായും ബുഷ്റ മനസ്സിലാക്കി. ഒട്ടും താമസിക്കാതെ, യാതൊരു ഉപകരണത്തിൻ്റെയും സഹായമില്ലാതെ, ബുഷ്റ സ്വയം തന്നെ അദ്ദേഹത്തിന് സി.പി.ആർ. (Cardiopulmonary Resuscitation) നൽകി. ഈ ധീരവും സമയോചിതവുമായ ഇടപെടലിലൂടെ ആ വ്യക്തിക്ക് ശ്വാസം തിരികെ ലഭിച്ചു.

ബഹ്‌റൈനിലെ ഒരു ഷെയ്ക്ക് കുടുംബത്തിൻ്റെ ഫാമിലി ക്ലിനിക്കിൽ വർഷങ്ങളായി ജോലി ചെയ്യുന്ന ശ്രീമതി ബുഷ്റ സി.കെ., ആതുര ശുശ്രൂഷാ രംഗത്തെ തൻ്റെ വിപുലമായ പരിചയസമ്പന്നതയാണ് ഈ നിർണായക നിമിഷത്തിൽ പ്രയോജനപ്പെടുത്തിയത്. മുമ്പും നിരവധി ജീവനുകൾ രക്ഷിക്കാൻ അവർക്ക് സാധിച്ചിട്ടുണ്ടെന്ന് നാട്ടുകാർ സാക്ഷ്യപ്പെടുത്തുന്നു. കേരള സർക്കാരിൽ നിന്ന് ആതുര ശുശ്രൂഷാ രംഗത്തെയും സാമൂഹ്യപ്രവർത്തനങ്ങളെയും മാനിച്ചുകൊണ്ട് നിരവധി പുരസ്കാരങ്ങൾ ലഭിച്ചിട്ടുള്ള ബുഷ്റ സി.കെ. തലശ്ശേരി, ഈ മലയാളത്തിൻ്റെ അഭിമാനമാണ്.

സംഭവസ്ഥലത്ത് സെൽഫിയെടുക്കാൻ തിടുക്കം കാട്ടിയവരോട് തനിക്ക് താൽപ്പര്യമില്ലെന്ന് അറിയിച്ച്, താൻ ചെയ്തത് താൻ ജോലി ചെയ്യുന്ന ബഹ്‌റൈൻ എന്ന അറബ് രാജ്യത്തോടുള്ള തൻ്റെ സമർപ്പണമാണെന്ന ആത്മനിർവൃതിയോടെ ബുഷ്റ ജോലിസ്ഥലത്തേക്ക് മടങ്ങി. ചാറ്റൽ മഴ എജുക്കേഷണൽ ചാരിറ്റബിൾ ട്രസ്റ്റിൻ്റെ അഭിമാന താരമായ ബുഷ്റ സി.കെ യ്ക്ക് ആരോഗ്യവും ദീർഘായുസ്സും നേർന്നുകൊണ്ട് എല്ലാവരും പ്രാർത്ഥിക്കുന്നു.