പെരുവയലിൽ വെറ്ററൻസ് ഫുട്ബോൾ ടൂർണമെൻറ് ആവേശത്തോടെ സമാപിച്ചു

പെരുവയലിൽ വെറ്ററൻസ് ഫുട്ബോൾ ടൂർണമെൻറ് ആവേശത്തോടെ സമാപിച്ചു

പെരുവയൽ:

പെരുവയൽ ടറഫ് കോർട്ടിൽ രണ്ടാം തവണ സംഘടിപ്പിച്ച വെറ്ററൻസ് ഫുട്ബോൾ ടൂർണമെൻറ് വർണ്ണാഭമായ പരിപാടികളോടെ സമാപിച്ചു. ഗ്രാമപഞ്ചായത്ത് പ്രസിഡണ്ട് സുബിത തോട്ടഞ്ചേരി ടൂർണമെൻറ് ഔദ്യോഗികമായി ഉദ്ഘാടനം ചെയ്തു.

ഉദ്ഘാടന ചടങ്ങിൽ ഗ്രാമപഞ്ചായത്ത് എട്ടാം വാർഡ് മെമ്പർ വിനോദ് ഇളവന, ദേവൻ ഇളവന, ഷാജി അറപ്പൊയിൽ, സി ടി സുകുമാരൻ തുടങ്ങിയവർ ആശംസകൾ അർപ്പിച്ചു. നിജേഷ് മുണ്ടക്കൽ സ്വാഗതം പറഞ്ഞ ചടങ്ങിൽ രഞ്ജിത്ത് രവീന്ദ്രൻ അധ്യക്ഷത വഹിച്ചു.

ടൂർണമെൻറിനോടനുബന്ധിച്ച് കാട്ടുമടത്തിൽ വേലായുധൻ നായരുടെ സ്മരണാർത്ഥം അദ്ദേഹത്തിൻറെ കുടുംബം പെരുവയൽ പാലിയേറ്റീവ് കെയറിന് ഒരു വീൽചെയർ സമ്മാനിച്ചത് ശ്രദ്ധേയമായി. ഇത് ചടങ്ങിന് കൂടുതൽ മാനുഷികമായ ഒരു തലം നൽകി.

വാശിയേറിയ മത്സരങ്ങൾക്കും പഴയകാല കളിക്കൂട്ടുകാരുടെ സൗഹൃദ സംഗമത്തിനും ടൂർണമെൻറ് വേദിയായി. ഒരുകാലത്ത് പെരുവയലിലെ ഫുട്ബോൾ മൈതാനങ്ങളിൽ നിറഞ്ഞു കളിച്ച പഴയ തലമുറയിലെ കളിക്കാരെ ചടങ്ങിൽ ആദരിച്ചത് ഹൃദ്യമായ ഒരനുഭവമായി.

പ്രാദേശിക ഫുട്ബോൾ പ്രേമികൾക്ക് ടൂർണമെൻറ് ഒരു നല്ല കാഴ്ചവിരുന്നൊരുക്കി.