മുസ്തഫയുടെ മൂന്ന് മക്കളുടെ ചികിത്സയ്ക്ക് ഷമീർ കുന്നമംഗലത്തിന്റെ സഹായഹസ്തം

മുസ്തഫയുടെ മൂന്ന് മക്കളുടെ ചികിത്സയ്ക്ക് ഷമീർ കുന്നമംഗലത്തിന്റെ സഹായഹസ്തം

മലപ്പുറം: സാമൂഹ്യ മാധ്യമങ്ങളിലൂടെയുള്ള ജീവകാരുണ്യ പ്രവർത്തനങ്ങളാൽ ശ്രദ്ധേയനായ അഡ്വക്കേറ്റ് ഷമീർ കുന്നമംഗലം, എടവണ്ണപ്പാറയിലെ പിതാവായ മുസ്തഫയുടെ മൂന്ന് മക്കളുടെ തുടർ ചികിത്സയ്ക്കായി 5 ലക്ഷം രൂപയുടെ സഹായം നൽകി. ഷാമിൽ എന്ന കുട്ടിയുടെ ചികിത്സയ്ക്കായി പൊതുസമൂഹത്തിൽ നിന്ന് സമാഹരിച്ച തുകയിൽ നിന്നുള്ള ഒരു പങ്കാണ് ഈ കുട്ടികളുടെ ചികിത്സയ്ക്കായി അദ്ദേഹം വിനിയോഗിച്ചത്.

മുതവല്ലൂരിലെ ഷാമിൽ മോനു വേണ്ടി ജനകീയ കമ്മിറ്റി സമാഹരിച്ച തുകയിൽ ശേഷിച്ച തുകയാണ് അഡ്വക്കേറ്റ് ഷമീർ കുന്നമംഗലം മുസ്തഫയ്ക്ക് കൈമാറിയത്.

ഈ സഹായം നൽകിയ ശേഷം ഷമീർ കുന്നമംഗലം പ്രതികരിച്ചത് ഇങ്ങനെ: "ഞങ്ങൾ മുന്നോട്ട് പോകുന്നത്, ഉള്ളതിൽ നിന്ന് ഒരു പങ്ക് ഇതേപോലുള്ള കുടുംബങ്ങളെ ചേർത്തുപിടിച്ചുകൊണ്ടാണ്. നിങ്ങൾ നൽകിയ ഓരോ നാണയത്തുട്ടുകളും അത്രമാത്രം വിലപ്പെട്ടതാണ്."

തൻ്റെ മൂന്ന് മക്കളുടെ ആരോഗ്യത്തിനു വേണ്ടി ഒരു ജീവിതകാലം കൊണ്ട് സമ്പാദിച്ചതെല്ലാം ചിലവഴിച്ച മുസ്തഫ, അവരെ ജീവിതത്തിലേക്ക് തിരികെ കൊണ്ടുവരാനുള്ള തീവ്രമായ പോരാട്ടത്തിലാണ്. ഈ ദുരിത സാഹചര്യത്തിൽ ഷമീർ കുന്നമംഗലത്തിൽ നിന്ന് ലഭിച്ച ഈ വലിയ സഹായം മുസ്തഫയുടെ കുടുംബത്തിന് വലിയ ആശ്വാസമായിരിക്കുകയാണ്.

പൊതുസമൂഹത്തിൽ നിന്ന് ലഭിച്ച സഹായം കൊണ്ടാണ് ഇങ്ങനെയുള്ളവരെ സഹായിക്കാൻ സാധിക്കുന്നതെന്നും, ഇത് നൂറ് ശതമാനം ആളുകളുടെ പൈസയാണെന്നും ഷമീർ കുന്നമംഗലം കൂട്ടിച്ചേർത്തു. അദ്ദേഹത്തിൻ്റെ ഈ ഉദ്യമം കൂടുതൽ ആളുകൾക്ക് പ്രചോദനമാകട്ടെ എന്ന് ഏവരും ആശംസിക്കുന്നു.