ആമിന താത്ത: തണൽ വിരിക്കുന്ന സ്നേഹത്തിന്റെ കാവലാൾ
എഴുതുന്നത്: ദിലീഷ് മലയിൽ
ചില മനുഷ്യർ അങ്ങനെയാണ്; അവർ കടന്നുചെല്ലുന്നിടത്തെല്ലാം പ്രകാശവും പ്രത്യാശയും പടർത്തും. ആൾക്കൂട്ടത്തിനിടയിൽ നിൽക്കുമ്പോഴും തനിച്ചായിപ്പോകുന്നവർക്ക് അവർ ഒരു കരുതലിന്റെ തണലായി മാറും. അത്തരത്തിലൊരാളാണ് ഞങ്ങളുടെ പ്രിയപ്പെട്ട ആമിന ജിജു, ഞങ്ങളുടെ സ്വന്തം ആമിന താത്ത.
എന്റെ അനിയത്തിയുടെ ജീവിതത്തിലെ ഏറ്റവും വലിയ കൂട്ടുകാരിയാണ് അവരിപ്പോൾ. 40 ശതമാനത്തോളം മാനസിക വെല്ലുവിളികൾ നേരിടുന്ന എന്റെ അനിയത്തിക്ക്, ആമിന താത്ത വെറുമൊരു സുഹൃത്തല്ല. അവളുടെ സങ്കടങ്ങൾ കേൾക്കുന്ന, അവളെ ചേർത്തുപിടിക്കുന്ന, ആത്മവിശ്വാസം പകരുന്ന ഒരു കാവലാളാണ്.
ഈ കഴിഞ്ഞ വിഷുദിനം എനിക്കൊരിക്കലും മറക്കാൻ കഴിയില്ല. ലോകമെങ്ങും ആഘോഷങ്ങളിൽ മുഴുകിയിരുന്ന ആ വേളയിൽ, തന്റെ തിരക്കുകൾക്കിടയിലും സമയം കണ്ടെത്തി സ്നേഹത്തിന്റെയും പ്രത്യാശയുടെയും കൈനീട്ടവുമായി താത്ത ഞങ്ങളുടെ വീട്ടിലെത്തി. അന്നാണ് ആ വലിയ വ്യക്തിത്വത്തെ ഞാൻ ആദ്യമായി നേരിൽ കാണുന്നത്.
ട്രൂ ലൈവ് ഓൺലൈൻ മീഡിയയുടെ മാനേജിംഗ് ഡയറക്ടർ, പ്രമുഖ മൈൻഡ് ഹീലിംഗ് തെറാപ്പിസ്റ്റ്, ലൈഫ് സ്കിൽ കൺസൾട്ടന്റ് എന്നിങ്ങനെ ഉത്തരവാദിത്തങ്ങളുടെ വലിയൊരു ലോകം കൂടെയുള്ളപ്പോഴും, ഒരു സഹജീവിയുടെ ചെറിയൊരു സന്തോഷത്തിനായി ഓടിയെത്താൻ കാണിച്ച ആ വലിയ മനസ്സ് എന്നെ വിസ്മയിപ്പിച്ചു. പദവികളേക്കാളും പ്രശസ്തിയേക്കാളും താത്ത വില കൽപ്പിക്കുന്നത് ശുദ്ധമായ മനുഷ്യത്വത്തിനാണെന്ന് ആ സന്ദർശനം എന്നെ ബോധ്യപ്പെടുത്തി.
സാമൂഹിക, സാംസ്കാരിക, ജീവകാരുണ്യ മേഖലകളിൽ തിളങ്ങുന്ന സാന്നിധ്യമായ ആമിന താത്ത ഇനിയും ഒരുപാട് ഉയരങ്ങളിൽ എത്തട്ടെ. ജീവിതയാത്രയിൽ തളർന്നുപോകുന്ന ഒട്ടനവധി പേർക്ക് താങ്ങും തണലുമാകാൻ സർവ്വശക്തൻ താത്തയ്ക്ക് ഇനിയും കരുത്ത് നൽകട്ടെ എന്ന് ഞാൻ ആത്മാർത്ഥമായി ആഗ്രഹിക്കുന്നു.
ഇന്ന് ആമിന താത്തയുടെ ജന്മദിനമാണ്. പ്രിയപ്പെട്ട താത്തയ്ക്ക് ഞങ്ങളുടെയും കുടുംബത്തിന്റെയും ഹൃദയം നിറഞ്ഞ ജന്മദിനാശംസകൾ നേരുന്നു. ഇനിയുള്ള കാലം എല്ലാവിധ ഐശ്വര്യങ്ങളും ആയുരാരോഗ്യങ്ങളും താത്തയ്ക്കും കുടുംബത്തിനും ഉണ്ടാകട്ടെ എന്ന് പ്രാർത്ഥിക്കുന്നു.
സ്നേഹപൂർവ്വം,
ദിലീഷ് മലയിൽ
Tags:
Articles